新闻访问
龍劍飛V丁蟹角色太深入民心，就連鄭少秋在 5月舉行的演唱會，也用了「丁蟹」這個名號。邵仲衡、陶大宇同郭政鴻日前接受《蘋果》專訪，話佢哋細細個都係睇鄭少秋啲劇大，三個最鍾意秋官古裝扮相，其中大宇同鴻仔最like秋官《倚天屠龍記》嘅張無忌，大佬孝就最like秋官喺《陸小鳳》嘅葉孤城。
講到三蟹眼中嘅秋官，鴻仔:「好詼諧、好搞笑、好幽默，好鍾意整蠱你。」大宇就話好錫佢哋幾個仔:「好鍚我哋，對我哋好好，我覺得係故意，等我哋唔好驚佢。我哋係聯交所拍嘢，我哋踎喺啲枱底休息，老豆都有過嚟同我哋傾玩，傾啲戲以外嘅嘢，好似自己生活上嘅嘢，點樣保養。丁蟹要用好多嘅能量去演，我問點解老豆你咁犀利，佢話我成日食花粉㗎，我覺得佢係故意，令到我哋融洽啲，唔好驚佢。」
大佬孝仲話係呢個老竇身上，學到點做一個好演員：「老竇好有自己嘅計劃，佢會俾你睇到佢點執行佢想做到嘅嘢，呢樣嘢對我都幾大影響，尤其是做戲嘅方式。」
大宇亦都大讚秋官有自己獨特嘅一套:「可能佢自己嘅出身，聽聞佢以前挨得好辛苦、好辛酸先至挨到今時今日扮嘢秋呢個地位，佢根基係咁打出嚟。」
是次訪問三缺一，問到佢地另一隻蟹仔吳啟明去咗邊？大宇就話對方已經退出咗娛樂圈，o依家係一個生意人，有另一種生活。而郭政鴻則指曾經喺馬來西亞巧遇過啟明，當時仲同對方一齊食過宵夜聚舊。
时上时时上：
【同邊個合作最開心？】汪阿姐趙雅芝合作最多 秋官勁讚李司棋好入戲 現年70歲嘅鄭少秋，今年入行50年。日前佢接受《蘋果》專訪，問佢覺得呢50年邊邊一個年代係佢嘅大時代，秋官就話:「我喺香港拍咗《楚留香》之後未算好好反應(其實係秋官客氣，當年香港嘅反應都好好)，但喺外地就好犀利，星馬、泰國、印尼同台灣，80年代我去台灣拍電影、拍電視劇、登台，剩係《楚留香》都已經拍咗幾個，都算係一個收成。你喺TVB再受歡迎、再紅嘅劇集，嗰個利益回報唔算太大，但去外地就好。同埋喺大陸拍《戲說乾隆》效果都好好。」
秋官70年代開始拍電視劇，當中有無數經典作品，問秋官個人最中意邊5部港劇時，佢就話係《書劍恩仇錄》、《倚天屠龍記》、《楚留香》、《誓不低頭》同《大時代》。問到佢唔滿意嘅作品又有邊幾部，秋官就數咗《桌球天王》、《非常外父》同《潮爆大狀》呢三部，佢話:「滿唔滿意就成敗定英雄，收視好就滿意，收視唔好就唔滿意，呢幾部可能唔得觀眾共鳴。」
講到女拍檔，秋官同過無數花旦合作，除咗佢金牌拍檔阿姐汪明荃之外，究竟最中意同邊個合作？秋官話:「個個都中意，其實合作得最多係阿姐同趙雅芝。咁司棋(當然係李司棋而唔係楊思琦啦)嘅戲係好穩定，佢消化得好好、好入戲，同佢合作《流氓皇帝》時，佢入到角色同形神比我更加多。」問秋官幾時再喺香港拍劇時，佢就話:「好嘅劇可遇不可求，有好嘅我梗係會做嘅。」
過去50年，秋官一直努力工作，有唔少輝煌成績，但亦因為咁，令佢人生留有遺憾，就係怪自己冇好好照顧媽媽。秋官講起都有傷感同內疚，佢話:「最遺憾係拼搏時間成日掛住工作，冇好好孝順我阿媽，我只係將我薪水比我阿媽，後來佢過身我先至知道，佢曾經臨走之前講過一句說話令我好難過，就係話我成日冇返去睇佢，我走咗你都唔知，諗番起呢句說話原來我真係有疏忽，冇好好地照顧佢老人家。」 :)
页:
[1]